Share this content on Facebook!
23 Feb 2010

Varo-po ka i kolimbambang dino om i gobuk minirumpak, tu ino-no it ikasana dit

ongogobuk dit ongokolibambang dino it mongurun dot ongovusak it ongokolibambang.

Manjadi boros dit ongogobuk, Osuhul-no patazon tokou it ongokolibambang dino, tu

mongorungoi dot ongovusak do kazu, ka dit ongogobuk dino om kinam-no mimpatai dot

ongokolibambang it ongogobuk dino. 

 

 

Manjadi boros dit ongokolibambang, Bang iaditi, tu mamatai-kou dahai, osuhul-no ong

mirumpak tokou-ogi, tu olumbatos dot avi -okoi, ka dit on ongokolibambang.

Boros di gobuk, Atag-no beno, mijanji tokou dot songira o kopirumpakan tokou, ka dit

gobuk. Boros di kolibambang, Osuhul-no ong kotoluvan antad biano misamung tokou

sid timbang do bavang do tuhunan, ka dit ongokolibambang. Manjadi nakun-no dot

ongogobuk do iadino. 

 

Manjadi amu-po norikot i kotoluvan dino minonodia dot ongobabambang it ongogobuk

dot varo-no ong rukom do pinili dot anaru o rugi.

 

 

Varo-no ong orukakang it piningonuvan dit ongogobuk dino. Manjadi norikot-po i

kotoluvan dino, sinumamung-no it ongogobuk sid pinijonjizan dot rikot siri dot nosodia-

no laid it ongokolibambang. Manjadi boros dit ongogobuk, Kuran tokou mirum-pak, tu

opodok-kou, ka dit ongogobuk dino. Manjadi boros dit ongokolibambang, Sumokot-okoi

sid ongoulu dikou om bambango-okoi dikou, ka di kolibambang dino. Boros di gobuk,

Atag-no-beno, ka di gobuk om piboros-boros-no dot, Ong varo kosokot sid dohon, nga

bambango-no dikou, tu amu dati emot koduruk, ka dit ongogobuk dino. 

 

Om timpuun-no mirumpak ino.

 

Manjadi boros dit ongokolibambang, Pagavi-kou banal, Pinglapakai tokou banal inot

ongoulu dot ongogobuk, ka dit ongokolibambang dino. Manjadi kodungko kosokot it

ongokolibambang dino sid ongoulu dit ongogobuk, bambangon-no dit ongogobuk dit

ongorugi dot rukum om it ongo-marampalavan dit nopingonuvan laid dau, nga

kodungko abambang, nga opihuzas it ulu dot ongogobuk. Topot it kolibambang dino

amu onong, tu tumulud di bambangon dit ongogobuk. Nga kinam-kinam-po mirumpak,

ka ino, nga navi it ongogobuk, tu minibambang-no songkoruhang. Ong i kolibambang

dino, ka, nga minsanko iso aso nohino dino, tu okonko onong dit ongogobuk

mamambang. Manjadi iadno dino o kinangaranan dot kolibambang, tu pinibambang dit

ongogobuk. Manjadi iadno dino ong i tangon do gobuk dino om i kolibambang di

minirumpak. 





23 Feb 2010


 

Varo-po i tongonon-ku dino i palanuk om i kogiu. Manjadi i hiza diri tumutud do tagad

sampai otuvong-ogi i pomogunan natakapan di lisun it adau. Manjadi iti palanuk manau-

panau sid somok di tinutudan i tagad. Amu songkuro nosomungan di palanuk i kogiu.

Manjadi boros di palanuk, Ade Odogiu, iti biano banal-ko osusa, tu a-nu emot iti

bogizuvon iti pomogunan. Imatai-pogi sinod kotonobon nga otuvong-ogi, ka di palanuk.

Manjadi boros di kogiu, Kuran-no ong ino iadino? tu otilib kito diti, ong kotongus ino

barat dot ologod, ka di kogiu. Boros di palanuk, Bang iadino, osuhul-no ong tulungai-

oku dot pomunduk dino ongosogo pambalado-oku sinod puun do monggis, ka di

palanuk. Boros di kogiu, Bang ikau dino, tu opodok, amu-ko otilib. Bang ioku, tu agazo,

tantu otilib-oku. Osuhul-no ong ioku ot pambalado sinod puun do monggis, ka di kogiu.

Boros di palanuk, Amu, tu ikau-nopo dino ahakang. Kumavid-ko sid ongokazu, nga amu

koviliu-ko, tu ahakang-ko. Ioku-nopo, tu okugui, tantu otilib-oku, ka di palanuk. Boros do

kogiu, Amu iadino, inoi nga ioku o pambalado, tu agazo, tu obintilib, ong agazo, ka di

kogiu. Na kinam-no miboros di palanuk om i kogiu dino, notori i palanuk, ong alaid-no.

Boros di palanuk, Bang ino iadino-bo, kuozon-po. Mogihim-okui dot ulun vokon dot

pokitulungan-ku mangambalad dohon, Ino-pogi pomunduk-no dinot ongosogo dino om

okuto-no sid puun do monggis, ka dino palanuk. Manjadi pomunduk-no i kogiu dot ongosogo om okuto-no sid puun do monggis om sumirio-no iosido. Boros di palanuk,

Bang iadino, sino-ko-nod puun do monggis, tu iambalud-to-no ikau, ka di palanuk. Na

rumikoto-no  i kogiu sid puun do monggis om gumobuo-no om pambalado-no di palanuk sampai navi inuntunan di sogo i novonduk di kogiu. Navi-po, notopuan ino kogiu dino dot  insanko pompod dot unturu nga aso-no kotulai, notopuan-no kavi dot ongosogo gama di palanuk mangambalad. 

 

Manjadi nopongo-po i palanuk pambalad di kogiu sid puun do monggis, pogidu-no

iosido sampai minong-irak-no dot, Oruvan. ko-no, Odogiu, ka, tu okonko bogizuvon iti,

baiko lisun dot tumutud do tagad i riniba, ka. Nga baiko titiim-oku dikau, tu ahakang-ko

banal, ka dino palanuk. Bang ikau dino, tu iadino kahakang, okuro ong iadino ogumu ot

sogo dino, nga oputut-nu kavi, ka. Manjadi tipongimot-oku di kahakang-nu, ka dino

palanuk. Boros di kogiu, Ikau-no Adalanuk o banalko araat. Elo-ko mangakal dohon.

Nga kada-po, ka dino kogiu om kinam-kinam moguhod i kogiu nga nongo-putut i sogo.

Na ino palanuk dino tiumang-kus-no, tu rumosi dot patazon dino kogiu iosido. 

 

Na kinam midu ino palanuk dino om i kogiu, nga naka-labus-no, kinamai-no mogihim

ino palanuk. Na okonko milod ahajangan dau, tu banal-ko siumusut ino palanuk. Alaid-

no manau-panau i palanuk dino, nokemot-no iosido dot povudukut o lobpung. Kemot-po

di palanuk, doromozo om tumimpak-ogi sid inuntunan di lopung om modopo-no iosido.

Manjadi ino kogiu dino okonko engkod mogihim ong okonko emot dau, tu banalko

nakasana di nakambalad iosido sid puun do monggis. Manjadi alaid-no diri mogihim i

kogiu di palanuk, nahajangan-no dot osodu-po otimpan-no dau dot mimpak-timpak sid

purun di timpak do lopung. Boros di kogiu, Hodi-ko Adalanuk. Nga kada-po. Asabak-ko

ong korikot-oku-no, ka di kogiu. Nga ong it osodu-po i kogiu minsanko humangog i

palanuk nga amu, posimozooni i kogiu. Bang it osomok-no i kogiu, boros di palanuk,

Odogiu, monguro-ko dino? tu ino boroson-nu dino amu-ku ohorotizan. Tu ioku diti

okonko nokedu-idu siti. Tu antad-po dit opodok sampai-no biano amu-no laid insan-oku

dot kopirimpanau do siombo-siombo, inoi nga sisiti-oku, tu mananggom-oku di hogkos

di aki. Tu humungot i aki, ong kedu-idu-oku-no, tu,  Takahon dot ulun, ka di aki, dot ino-ogi ikau nga retan-nu ko ioku o minangambalad

dikau sid puun dot monggis, asot andaman-ku dino, ka dino palanuk. Boros di kogiu,

Iadko-no dino, Tu ima sori nga retan-nu dot bogizuvon. Ino-po dino nga a-ku elaan nunu

o boroson-nu dino, ka di kogiu. Na boros di palanuk, A-ku-no elaan momoros ong

iadino, tu isot elaan-ku ong ioku, banalko sisiti-oku laid antad dit opodok-oku-po. 

Ong ino boroson-nu dino a-ku ohorotizan, a-ku elaan, ka di palanuk. Amu, ka di kogiu,

okonko a-ku otutunan ikau, ka. Tu, buris-ko, ka. Boros di palanuk, Aso pogintutunan

ong buris, tu ong dahai do bansa enizo palanuk dot buris kavi, ka dino palanuk. Na

boros di kogiu, Banal-no om buris, topot ikau-no iri, tu otutunan-ku banal, ka di kogiu.

Odogiu, ka di palanuk, bang iadino boros-ku amu-koi mangasip nga ombo-no kekau

ong manahaja-ko-no dot ulun, ka di palanuk om kinam-no midahava-midahava, nga

notori i kogiu ong alaid-no. 

 

Na boros di kogiu, Bang ino iadino, tu amu nakapanau-panau-ko, ka di kogiu, om sukul

ong banalko okonko ikau, ka, sampai-no inot ong tomodon-nu pentoron-ko siti nga

mananggom dinot hogkos di aki-nu, okon-poko nunu boroson-ku, ka di kogiu. Engin-oku

dara mimot dinot hogkos di aki-nu, ka. Ai, atok, ka di palanuk, Banal dara-bo ino,

Odogiu, ka. Nga kasalaan-ka-nopo, a-ku atamaan dot varot ulun do kovoli, ka. Tu ino

ong ohizaan dot mimot-ko om korikot i aki, ka, siombo ot okonko ioku ot oduhon, ka di

palanuk. Na kinam gumorot-gumorot i kogiu, tu banalko engin mimot di hogkos, na

boros di palanuk, Ong iadino, sukul om kedu-oku-po, ong banal-noko ogorot-ko, nga

atagi, ka. Topot peduo-oku-po, tu banal-noko oruol i ginavo-ku dino, ong mad

ungkozuton-nu ino hogkos dot okonko kedu-oku-po, ka di palanuk, tu amu-oku engin

dot imata-imatan-ku dot ungkozuton i hogkos di aki dino, dot ioku-ogi kondiri nga a-

insan-ku ungkozuto, bai ulun vokon, ka di palanuk. Na boros di kogiu, Bang iadino,

pogidu-no, ong sukul om koho-ko, ong kedu-ko-no, ka di kogiu. Na boros di palanuk,

Bang iadino, iduan-ku dot ongoiso ot ulun mongumo, na tavahanan-to-no ikau om

ungkozuton-nu-no, ka. Ai, iadnobo dino, ka di kogiu. 

 

Na pogidu-no i palanuk dot nokedu-po ongoiso-not ulun mongumo diri, na tavahanai-no

di palanuk i kogiu dot,   ngkozuto-no, tu osodu-oku-no, ka di palanuk. Na ingkakat-no i

kogiu dino om rikoto-no i lobpung om mad ungkozutoi dot iadko it kopong-ungkozutan

dot hogkos banal. Kopuriman-rimanai-po do lobpung dot varot kinumavid dau, kinam-

kinamai-po tuminduk ino kogiu om kinam tumabid. Nga notopuan-no vagu i kogiu, tu it

inan, it avak, liou, nga notobidan kavi dit lopung. Atok, ka di kogiu, i Adalanuk-no ot

araat, ka, Lopung bala iti, ka, retan di Adalanuk ko hokos di aki dau, ka. Om kinam-

kinam moguhod i kogiu, kinamai momutut i lopung dino, nga nopututi dau, tu banalko

ahakang i kogiu. Na orukung-no iosido, tu it ongotikagang nga varo notipu, kopihot di

lobpung tumabid. na nakalabus-po i kogiu dino om i lobpung, nga minatai-no, pamanau-

no vagu do modihim di palanuk, tu ka di kogiu, Bang biano om emot-ku i Adalanuk,

asabak-no, tu patazon-ku, ka di kogiu. 

 

Na ino palanuk dino minodihim-no vagu dot susuton dau. Alaid-no manau-panau diri,

nakahajang-no dot vinalai do surun dot mirad do panding kagazo, dot bai a-kosondot

sid tana minit-ginit it vinalai do surun. Na i kogiu manau-panau modihim di palanuk,

alaid-no nemot-no dau i palanuk di moub-loub. Boros di kogiu, Hodi-ko-no vagu,

Adalanuk, ka, Ikau-no vagu iri, ka. Na ino palanuk dino olungui-no, tu banalko sumamba

dinot kogiu. Boros di palanuk, Nunu-no ino boroson-nu dino? ka, tu a-ku ohorotizan, ka.

Boros di kogiu, Iadko-no dino. ka, Retan-nu-ko a-ohorotizan-nu, ka, dot it insani, nga iadino i boros-nu, ka. Na patazon tekau ong biano ka, Tu banal-ma-ko nasansara-oku di

lobpung, ka. Boros di palanuk, Pongining-po, Odogiu, ka, tu ioku-ma diti, ka, antad dit

opodok-po, sampai biano, ka, siti-oku-no siti, ka. Tu sinuhu-oku di aki manganggom

dino java dau, ka. Ino-ogi om korikot-ko siti, Na patazon-oku dikau, ka, Amu atag ino

iadino, ka di palanuk. Boros di kogiu, Iadno dino it akal-nu, ka, tu it insani, nga retan-nu

ko hokos di aki-nu, ka; Ino-no dino retan-nu ko java, ka. Boroson-ku-bo, Odogiu, ka di

palanuk, tu java ong iti diti, ka. Inot ong lobpung kanu dino, a-ku elaan ino, ka. Ikau-

nobo iri, ka di kogiu, tu buris-ko, ka. 

 

Topot boros dino palanuk, Asot boros-nu ong buris, tu sokoviai ong palanuk enizo buris.

Manjadi buris-nopo nga ioku-no, aso-no patut ong ino dino, ka di palanuk. Boros di

kogiu, Bang ino-bo iadino, tu okonko elaan-kekau, nga engin-oku monuntung dinot java

di aki-nu, ka. Boros di palanuk, Ong inot iadino, Odogiu, ka, mokimahap-oku dikau, ka,

tu bang orongou-ku inot uni dino java dino, ka, i aki-ogi nga okonko sino-po, ka, siombo

dot a-oruol i ginavo-ku? ka. Manjadi nga korikot-ko siti, nga tuntungon-nu ka, na amu-

oku, ka di palanuk. Boros di kogiu, Bang iadino, tu a-ku potuntung, ka, Pisoson tekau,

ka, irason tekau ino, ka di kogiu. Na ong ino iadino, ka di palanuk, Tu banalko engin-ko,

ka, na pedu-oku-po, ka. Tu banalnoko oruol i ginavo-ku dino, ka. Boros di kogiu, Bang

ino-bo iadino, ka, na pogidu-no, ka. 

 

Na pogidu-no i palanuk dot ongoisot ulun mongumo it pinogiduan om tavahanai-no inot

kogiu dot, Tuntungo-no, nokedu-oku-no, ka dino palanuk. Panganu-no i kogiu do kazu

om bambang-bambango-po inot vinalai do surun om kohuzas-no sampai kinam-kinamai

sumingot i kogiu, nahadan ino kogiu. Ingkod-ingkadai-no dit ongosurun moningot ong

nahadan ino kogiu dino. 

 

Na nogulian-po i kogiu, Ai, adok, ka di kogiu, i Adalanuk-no ot araat, ka, Intolu-no it

sansara-ku diti, ka, Akalan-oku-nopo, ka. Nga ihimo-ku-po vagu i Adalanuk, ka di kogiu,

banal-ma-ko araat, ka di kogiu. Om pamanau-no ino kogiu modihim. Na ino palanuk

dino kinumaa-no sid timbang dot olungan. Na nokorikot-no sid olungan, nemot ino

buhazo do modop-odop do banalko agazo. Nemot-po di palanuk, doromozo om

tumimpak-no sid ulu di buhazo. Na i buhazo okonko noposik. Na ino kogiu dino okonko

engkod-ingkod modihim di palanuk, dot alaid-no diri notimpan-no dau dot mimpak-

timpak i palanuk sid ulu di buhazo. Boros di kogiu, Ikau-no iri i Adalanuk, ka. Nga

asabak-ko-no ong biano, ka. Na inot palanuk dino olungui-no, tu banalko rumosi di

kogiu sampai boros di palanuk, Kada-no kirad dino, Odogiu, ka, tu ioku ma diti, ka, a-

insan do kedu siti, ka. Antad dot opodok-ku, nga siti-oku-no siti, tu mananggom-oku di

sundatang di aki-ku, ka. Boros di kogiu, Ino-no ong ikau dino, ka. Varot tatanggaman-

nu, ka. Tu baiko ipanansara dohon, ka. Otutunan-ku kagi banal ikau, tu ino buris-ko, ka

di kogiu. Boros di palanuk, Aso iado-nu dino, ka. Tu sokoviai ong palanuk nga enizo do

buris, ka. Manjadi nga buris-nopo nga ioku-no, ka, Amu apatut ong ino dino, ka. Tu

banal-banal ong ioku diti-ko, a-insan kedu, tu humungot i aki, ong iduan-ku iti sundatang

dau, ka om kinam-no miboros di palanuk om i kogiu. 

 

Boros di kogiu, Bang ino iadino, tu okon bala kekau, ka, engin-oku dara monundatang

dino sundatang-nu, ka, i sundatang di aki-nu, ka di kogiu. Boros di palanuk,

Mokimahap-oku dikau, ka, tu a-insan kosundatang iti, ka. Na boros di kogiu, Banal-no

om a-insan kosundatang, nga ioku ot engin monundatang, ka di kogiu. Boros di

palanuk, Amu-oku, ka, tu ong orongou-ku it uni di sundatang diti, tantu oruol i ginavo-ku, tu okonko emot-imot-ku i aki, ka. Boros di kogiu, Bang ino iadino, tu okonko povoli-ko

do sundatang-nu, ka, osuhul-no ong irason tekau, ka di kogiu. Na korongou-nopo di

palanuk i iadino, Bang ino-bo iadino, na sumino-oku-po, ka di palanuk, sid timbang do

bavang, ka. Siti-ko-bo-to-, ka di kogiu. 

 

Na nokosiri-pod timbang do bavang i palanuk, Tuhunai-no ino sundatang di aki dino, ka

di palanuk, om tuhunai-no di kogiu om obilo-no ino buhazo. Koguzu-guzu-po ino buhazo

dino om kopurimanai dot varot kiumavid dau, kinam-kinamai sumimpad ino kogiu, nga

misoribau misaralom sinod vaig. Na kinam-kinam miuhod, amu-ogi songkuro om

tilantung-po dino buhazo, tu nouvak-no inot roo. Om ino kogiu nga minatai-no, tu nogop

di buhazo it ulu di kogiu. Na i buhazo, nga  minatai-no, i kogiu o minatai-no.

Minikuvaluni sinod bavang. Na ino buhazo dino mantung-lantung-no, tu minatai-no om i

kogiu nga minatai-no. 

 

Na kemot-nopo dit ongobuhazo vokon, boros di buhazo, Ino-ma koruhang tokou dinoi

elaan-ku i kinapatazan, I gama di palanuk sinod kogiu, tu retan di palanuk ko sundatang

di aki dau. Manjadi ino buhazo dino miumbal di kogiu, nga aso om aso notori, sompi

minatai. Na osuhul-no ong surungo tokou i palanuk, ka. Bang iadino, ka di buhazo,

Okonko bai i Odogiu minatai, nga mulongko bansa tokou nga varo minatai. Osuhul-no

ong pimpatazan ino palanuk dino, ka. Mogoti ot akanon tokou, ka di buhazo. Na ino

palanuk kakali sid timbang do bavang.  Boros di palanuk, Ino-mai banal dikou, ka, ioku

o nakapatai dino buhazo dino. Na kadan-no ong miakal, osuhul-no ong mirumpak tokou

tantu. Mijanji tokou, ka di palanuk. Boros di buhazo, Sino-koi bala Adalanuk, ka. Na

atag-neno, ka. Iokoi nga engin do mirumpak, ka. 

O, nga, boros dino palanuk, Songira kopirumpakan tokou? ka. Boros di buhazo. Ombo-

no-ko ikau, ka, Ikau mangajanji, ka di buhazo. Na bang iadino, ka di palanuk,

mangajanji-oku-no, ka, Kotoluvan antad biano, ka. Om misamung tokou siti, tu 

mirumpak tokou-no, ka. Ino-pogi, ka, ong kouli-kouno, ka, mongindongou-kou-no dot

ongoulun dot sokoviai it ongobuhazo tumimung kavi sumamung, tu iokoi ma diti, ka, nga

otimung-okoi sumamung dikou, ka di palanuk, tu ino-nopo miakal amu atag, ka. 

 

Na pengkaa-no, ka di buhazo, ino-pogi, ka, sumarap tokou banal sid kotolu't adau, ka.

Ai sumarap, ka di palanuk, ikou nga sumarap, iokoi nga sumarap, ka. Na mulio-no ino

buhazo om kinam-no minghabal sokoviai i buhazo pinosulok-no kavi sinod pirumpakan

dot janji di pisomungan. 

 

Na inot palanuk dino sosodop-ogi dit koduvo it adau rumikot-no iosido sid pantai om

kinam-no mingandak-ngandak, nga sampai notongkop-no it pantai dot orutik-ogi ot ihud.

Dot ino palanuk dino okonko kikoruhang, iseso iosido miningandak-ngandak

minonongkop di pantai dit ihud. 

 

Na sid kotolu-pot adau ongotopian manggas-ogi it adau, nokorikot-no i buhazo, tu

sumarap i janji. Na ino palanuk nga kakal-no sisino, nga baiko iseso ma ong i palanuk.

Boros dit ongobuhazo, Siombo-no i koruhang-nu? ka. Boros di palanuk, Ikou-no bala

buhazo ot amu monuluk do janji, ka, tu i janji tokou sumarap, ka. Ikou ogi om asavat-no

it adau om korikot-kou-ogi, ka. Ioku diti, ka, ogumu o koruhang, ka. Topot nokouli-no, tu

nabasan mong-inud dikou, ka. Imatai-pogi dikou inot ihud, ka. Boros di buhazo, Banal-

no ino, ka. Nga iokoi diti amu adau banal, ka. Ino koruhang dikou amu nokenud dahai,

ka di buhazo. Nga rumpakon om iso-ko-no dino, nga aso 

guna, ka di buhazo. Osuhul-no ong mijanji tokou vagu, ka, tu misamung tokou vagu siti,

ka.  Ai, iadino, ka di palanuk, nga a-ku el-elaan dot piro o posomungon-ku dikou, 

ong okonko ezap-po, ka. Ino pogi ong kavasa, nga izapon-ku ikou, supaya elaan-ku dot

songkuro-kou kogumu, ka. Ai, kavasa, ka di buhazo, izapo-koi-no, ka. Bang iadino, ka

di palanuk, todung-kou-no sinod tindal, ka. Potodung-todungo-no inot ongoulu dikou,

ka, tu izapon-ku, ka. Na piahatu-no i buhazo om sokoviai it ongoulu, nga nitodung-no

sinod tindal, timbang do bavang.

 

Na timpuun-no di palanuk i sid pompod sampai mininsarazo dot ino-no i gama

mongizap, Iso, duvo tiuk, ka, baiko monizuk di mato do buhazo, nga lumosodi sampai

navi i buhazo. Nokensarazo-po navi i buhazo, tu sampai sid sarazo i buhazo. Na boros

di palanuk, Takal-akakal, ka, tu okonko kiko-ruhang-oku diti, ka, nongobolou-ku-po ikou,

ka di palanuk. Na ino buhazo dino nenizo dot obolou, om ino palanuk dino nga

minogidu-no dot a-nosulian iosido. 

Iadino i tangon di palanuk om i kogiu. 



23 Feb 2010

Manjadi i hiza dot adau badi dino, minamadtalob-no kavi it ongoulun. Nemot-po di

Usan-usan do mamanau it ongoulun, mad kumivozooi mamanau. Nokorikot-po sid

tuhunan, minidagang-no it ongoulun. 

 

Topot ong i Usan-usan dino rinumikot sid valai di Sarip. Manjadi rumikoto i Usan-usan

dino do monguus-nguus i Sarip dot tobu. 

 

Kemot-nopo di Usan-usan do monguus i Sarip do tobu, ponginsuguti iosido dit inuusan

di Sarip. Kemot-nopo di Sarip do iadino, duatoi i Usan-usan dot omis om amu, Ba Usan-

usan omis? ka di Sarip. ponimpa-nopo i Usan-usan, Au, amu-noka omisoi, nga kiavaui

ma gima do tobu, ka di Usan-usan. Manjadi nopongo-po i Usan-usan monginsugut dino,

mulio-no iosido dot ongokoturuan-ogi antad diri, varo-no nokorikot dot uripon di Sarip, tu

sinuhu di Sarip mongohukum di Usan-usan dot ino-no ot indomoon di Sarip, Sampasu

ot utok do sonit om sampasu ot utok do pirit. Bang amu manahak i Usan-usan, nga

patazon-ku, ka di Sarip. 

 

Manjadi korongou-nopo di Usan-usan i iadino, Ade, ka di Usan-usan aso-bo karaatan

dino ong kotibang-oku-ogi. Kasalaan-ka-nopo tu banalko amu-oku kotibang; kagi-po

pakakas-ku nga aso. Tu dangol-ku nga aso,  vasoi-ku nga aso, tavus-ku nga aso.

Manjadi bang iadino, uli-kou-no om ovito dikou iti jarum-ku, iti diti iposupu-ku di Sarip

dot iso o vasoi om iso o dangol om iso o tavus. Manjadi ong osupu-no iti, sumori-oku-

ogi, tu mangatod-oku dinot utok do sonit om utok do pirit, ka di Usan-usan. 

 

Manjadi kahabarai-nopo i Sarip dino, Ade, ka di Sarip, sumaap i Usan-usan dohon diti.

Nga kaho-kou muripon, habarai dikou i Usan-usan ipokogos di Usan-usan iti ruvab, tu

orikot do ruvab iti podsupuan-ku, kokogos-no iti ruvab om supuon-ku-ogi iti dangol dau,

ka di Sarip. Manjadi korongou-po di Usan-usan ino iadino dino, pomoros-no iosido dot,

Ade, osusa-no iti iaditi diti, tu banal-noko amu-oku kotibang. Topot ilo ruvab dilo ong

kosori-oku-no, tantu ikogos-ku ilo. Manjadi pogulu-kou-no muli, sakali ovito-no dikou iti

bubuk do dalai sid Sarip ipatali di Sarip iti; atali-no iti bubuk diti om sumori-oku-ogi, tu

pokogos-oku dilo ruvab, ka di Usan-usan. 

 

Manjadi norongou-po di Sarip i boros di Usan-usan i iadino, banal-noko nokohungot.

Bang iaditi, ka di Sarip, osusa-okoi-no di Usan-usan mihukum diti, ka di Sarip. Tu okon-

okonko manahak i Usan-usan dino hukumon-ku, gamko sumaap-ogi dohon, ka di Sarip.

Manjadi bang iaditi, osuhul-no ong mamanggil-oku dit ongosarip vokon om ongotumpu

om ongosulutan, ka di Sarip. Manjadi pongoligou-no i Sarip dino. Nongokorikot-po i

linigou dino, pomoros-no i Sarip, boros di Sarip, Ioku diti ino-no o kinapataranangan-ku

dikou diti, Mihukum-okoi di Usan-usan, tu pengkaa om pengkaa i gama di Usan-usan

sid dohon, ka di Sarip. Manjadi bang otori-oku di Usan-usan, nga itahak-ku iti valai-ku

sampai iti sokoviai it ongobarang om ongouripon-ku. Bang i Usan-usan ot otori, tantu

patazon-ku i Usan-usan dino, tu banalko mangamalu dohon, ka di Sarip. 

 

Manjadi nipongoi-no dit ongouripon i Usan-usan dino. Topot boros di Usan-usan. Amu-

oku sumori diti, tu banat-ku nga aso, soval-ku nga aso. sigal-ku nga aso, ka di Usan-

usan. Manjadi norongou-po di Sarip i iadino, patadai-no do soval om banal om sigal.

 

Baharu-ogi om minamanau i Usan-usan. Manjadi nokorikot-po i Usan-usan dino,

pomoros-no i Sarip dot, Pakanon-po laid i Usan-usan dino om mihukum tokou-ogi, ka di

Sarip. Manjadi tinahakan-no do vaig i Usan-usan dot ino-ogi valai dino om antad-no sid

natad do vinaladan do poriaman ( permaidani) sampai sid rinantai, tu poginakanan dot

agazo di Sarip, tu kapamatazan di Usan-usan, Manjadi boros di Usan-usan, O Sarip,

siombo-ka o pomougan-ku ditioi? ka di Usan-usan. Ponimpa-nopo i Sarip, Pogihimo-

boto dot araatan-ko, ombo ot araatan-ko, sino-no o pomougai, ka di Sarip, Manjadi

minikovili-vili-no i Usan-usan dot nemot-no it idi di Sarip dot modop-odop sid somok do

rinding. Manjadi kemot-nopo di Usan-usan, banal-noko araatan iosido, tu urun-urunon-

po do togonok i mato dit idi di Sarip, na onuvo-no di Usan-usan i vaig om tumoronongo-

no iosido siri om pomoug-no sid mato diti idi di Sarip, dot inonong banal i mato dit idi di

Sarip. Dot nokotigog-ogi it idi di Sarip dot, Atok di Usan-usan, tu ombo ioku nga

pomougan dau. Ginazo diti sirang kopomougan, ioku-ogi iti pomougan, ka dit idi. 

 

Manjadi kemot-nopo di Sarip iadino, Nokokuro-ka Usan-usan, tu iadino ino gama-nu;

ginazo diti sirang kopomougan-nu, ombo i indi nga pomougan-nu? ka di Sarip.

Ponimpa-nopo i Usan-usan, Amu-bo elaan Sarip tu ino-no ot araatan-oku, tu iti sokoviai

nga banalko ongovavantang, baiko i indi-nu ot araat, ka di Usan-usan. Manjadi

korongou-nopo dit ongosarip vokon om it ongotumpu om ongosolutan do iadino,

pomoros-no dot, Ikau-bo Sarip banalko araat-ko. Elaan-nu-no dot lovong ot ulun, nga

kakali dot iadino ino gama-nu, ino gama di Usan-usan dino antad om antad sid dikau.

Manjadi bang iokoi o mongitung, tantu ikau ot araat, tu kumihi-ko dot ulun do lovong.

Manjadi amu osusa mihukum iti. Pogidu-no sitid valai-nu. I Usan-usan-no o sanganu

diti, ka dit ongosarip om ongotumpu om ongosulutan, Manjadi minogidu-no i Sarip dino

dot iso-po o lanjang om iso o kava om sanggantang o vagas o novit. Om i savo om it

angaanak sampai it idi dau o nokovozo. Topot ong it onguripon dino nokopung-no kavi

sid di Usan-usan. Manjadi iadno dino o   kinompuso ong i tangon di Usan-usan om i

Sarip.

 



23 Feb 2010

Varo-po i tambang dino manau-panau sid isan do tagad. Manja inot orimau dino nga

manau-panaui sinod isan do tagad. Manjadi miringuvab inot orimau. Iti tambang nga

miringuvabi. O-hai, ka dit orimau, O-hai, ka di tambang. Korongou-nopo dit orimau do

miring uvab iti tambang, banalko asana sampai boros dit orimau, Nokokuro ka

Adambang, tu monusui-ko dohon miringuvab? ka dit orimau om kinamai-no mongogusa

iti tambang, om i tambang, nga  kinam-no, tumangkus, tu mogidu-no. Alaid-no

tumangkus iti tambang, nokorikot-no sid natad do sulap, dot ino sulap dino, varo

kambing sino, tu azam dit Anak Vagu. Manjadi kemot-nopo di kambing do mangkus-

tangkus i tambang, duatoi do nokokuro, tu tumangkus. Boros di tambang, Tumangkus-

oku diti, tu gusaon-oku dot orimau, ka di tambang. 

 

Boros di kambing, Kada ikorosi, gamko siti-ko dohon, tu tabangan-kui ikau, ka di

kambing. Manjadi minintoron-no i tambang dino sampai nokorikot it orimau. Manjadi

nokorikot-po it orimau dino, pomoros-no dot, Nokokuro-ka, Adambing, tu onuvon-nu ino

tambang-ku, ka dit orimau. Boros di kambing, Nokokuro, tu retan ko dikau do tambang,

dot dohon do tambang iti, azam-ku ong iti tambang diti, ka di kambing. Boros dit orimau,

Amu, dohon dino, alaid-ku-no pigugusa ino, ka dit orimau. Boros di kambing, Banalko

dohon, ka. Alaid-ku-no piaazam iti, ka di kambing. Bang amu-ko kasip, nga ikau dino

nga azamon-kui, tu ipongoduvo-ku dit azam-ku dot orimau, ka di kambing. Boros dit

orimau, Nokokuro, tu baiko ikau om kapangazam dot orimau, ka dit orimau. Boros di

kambing, bang amu-ko kasip do kiazam-oku dot orimau, nga imatai tokou silod

pinosuvangan-ku, ka di kambing. Om pigagazad-no kumaa sid talaga dot aralom-po om 

oliou-po. Nokorikot-po siri, boros di kambing, Ba, Orimau, bang amu-ko kasip nga

imatai-no sinod rinuvang do kandang-ku inot orimau-ku. Bang kosuvang-ko-no dara,

ikau dino nga koduvo-no, ka di kambing om molungungo-no it orimau dino sid rinuvang

do talaga, nga banal-banal-ko varot emot dau dot orimau sid rinuvang, tu it ondig-ondig

dau. 

 

Kemot-imot-po dit orimau, Atok, azam-oku-no diti, ka dit orimau om kinam-kinam-no

tumangkus, nga suvai-ko minintoron ong nokemot do kara. Manjadi kemot-po di kara,

Nokokuro-ko Orimau, tu tumangkus-ko? ka di kara. Boros dit orimau, Azamon-oku di

kambing, tu ipongoduvo dit azam dau dot orimau sid rinuvang do talaga, ka dit orimau.

Boros di kara, Okonko orimau iri, baiko it ondig-ondig-nu iri, ka di kara. Ino-pogi miguli

kito sori om patazo-to i kambing, ka di kara. 

 

Manjadi miniguli-no it orimau dino om i kara dino nga kinumogos-no sid iku dot orimau,

tu Malan-oku mamanau, ka di kara. Manjadi minsosomok-ogi it orimau dino om emot-no

di kambing, nemot-po di kambing it orimau om kinam-no momunsangal i kambing dino,

nga tongirad do lingkut i tana dot osukab di tondukon dau. Kemot-imot-po di orimau i

iadino, nga kinam tumangkus mogidu, tu Amu atangkaan ong iadino o kahakang, ka dit

orimau. Nga ino-po kara sinod iku dau dino, nga minatai-no, tu kazai mahid-ahid sid

govuton. 

 

Manjadi it Anak Vagu dino mangaladtak do parai it imot dit orimau i tondukon di

kambing, baiko kurulu do parai it iada dit Anak Vagu sid panahambai do sulap. Manjadi

olungung it Anak Vagu sid panahambai do sulap do varo tambang siri onuvo-no dit

Anak Vagu it bilok dau om tokono-no it tambang, nga minatai banal. Manjadi iadno dino

ong i tangon do tambang, minataii-minatai i sondot do tambang. 

 

 



23 Feb 2010